Горняцкий мен Перцевка ауылдарының әкімі Зейнелғабиден Әбілов елді мекендерді абаттандыру бойынша алдағы жұмыстар туралы баяндады. Ауылдарды жарықтандыру, жолдарды жөндеу, көгалдандыру және жаңа мәдени нысандарды орнату сияқты бірнеше маңызды жоба іске аспақ.
Әкімнің айтуынша, Горняцкий ауылында 1154 адам, ал Перцевкада 548 адам тұрады. Екі елді мекеннің де экономикалық белсенді тұрғындары басым – бұл көрсеткіш 89%-ды құрайды.
Горняцкий тұрғындарының көпшілігі «ССГПО» АҚ-да жұмыс істесе, Перцевка тұрғындарының көбі Рудный мен Қостанай қалаларына барып еңбек етеді. Сонымен қатар, ауылда жеке шаруашылығын жүргізіп отырған азаматтар да бар.
Алдағы жұмыстарға тоқталған Зейнелғабиден Әбілов ең алдымен көше жарығын қамтамасыз етуге баса назар аударды.
– Бүгінде екі ауыл да толық жарықтандырылған. Өткен жылы Горняцкий ауылын жарықтандыруға 5 миллион теңге бөлініп, үлкен жұмыс атқарылды. Ал биыл қосымша 2,3 миллион теңге қарастырылып отыр. Бұл қаражат Горняцкий мен Перцевкадағы көше жарығын техникалық қызмет көрсетумен қамтамасыз етуге жұмсалады, – деді ол.
Ауылдарда жыл сайын ағаштардың бұтақтарын кесу және көгалдандыру жұмыстары жүргізіледі. Бұрын бұл мақсатқа 600 мың теңге көлемінде қаржы бөлінсе, биыл бюджет үш есеге ұлғайды.
– Қала бюджетінен 1,5 миллион теңге бөлінді. Тиісті конкурс өткізілді, мердігер ұйым жұмысты бастап кетті. Алдымен Горняцкийде негізгі жұмыстар атқарылып, содан кейін Перцевкаға көшеді, – деді әкім.
Ауыл ішінде өсіп тұрған ағаштар мен бұталар белгілі бір тәртіппен қырқылып, ретке келтіріледі. Бұл жұмыс қауіпсіздік шаралары үшін де, көгалдандыруды сақтау үшін де маңызды.
Қыс мезгілінде жолдарды қардан тазарту, ал жазда шөп шабу жұмыстары тұрақты түрде жүргізіледі. Биыл бұл жұмыстарға бөлінген қаржы көлемі айтарлықтай артты.
– Өткен қыс қарлы болды, ал биылғы жауын-шашын көлемі салыстырмалы түрде аз. Дегенмен, Горняцкий мен Перцевкадағы көшелерді қысқы және жазғы кезеңде механикалық тазалау үшін 10,5 миллион теңге бөлінді.
Жаз мезгілінде шөп шабу тұрақты түрде жүргізіледі, бұл үшін мердігер ұйыммен келісімшарт жасалды. Біздің басты мақсатымыз – көше жолдарын таза, ал жасыл желектерді реттелген күйде ұстау. Жыл соңына дейін ешқандай мәселе туындамайды деп ойлаймыз, – деп түсіндірді әкім.
Қазіргі таңда Горняцкий ауылында мәдени іс-шаралар ұйымдастыру үшін арнайы орын жоқ. Барлық іс-шаралар уақытша шешім ретінде Мичурин көшесінде, жол бойында өткізіледі. Бұл мәселе жақын арада шешімін табады.
– Ауылға жаңа сахна орнату үшін қаржы бөлінді. Қазір металл конструкциядан жасалатын сахнаға сметалық құжаттар әзірлеп жатырмыз. Бұл жобаның жалпы құны шамамен 14 миллион теңгені құрайды. Бұл сахна ауыл тұрғындары үшін үлкен мүмкіндік болмақ. Түрлі мәдени іс-шараларды өткізетін арнайы орын болады. Өкінішке қарай, сахнаны Наурыз мерекесіне дейін орнату мүмкін емес. Бірақ мамыр айындағы мерекелерге дейін сахнаны толықтай орнатуды жоспарлап отырмыз, – деп атап өтті Зейнелғабиден Әбілов.
Әкім сондай-ақ бұл бастаманы қолдаған Рудный қаласының әкімі мен қалалық мәслихат депутаттарына алғысын білдірді.
Жалпы, Горняцкий мен Перцевка ауылдарын дамытуға арналған жұмыстар бірнеше бағытты қамтиды. Олардың қатарында жолдарды жөндеу, көшелерді жарықтандыру, жасыл желектерді реттеу, қоқыс тазалау және ауыл тұрғындарына арналған қоғамдық кеңістіктерді дамыту бар.
Алдағы уақытта әкімдік осы жұмыстарды жүйелі түрде жалғастырып, ауыл тұрғындарының жайлы өмір сүруі үшін бар күшін салатынын жеткізді.
Сахнаның жанында саябақ аймағы жасақталмақ. Бұл жұмыстарға 5,6 миллион теңге бөлінген. Әкімнің айтуынша, саябақ ауылы әкімдігіне жақын орналасады. Қазір бұл жер қалың шөп пен бұталарға толы. Жасыл желекті ретке келтіру үшін ағаштарды кесу жұмыстары басталып кетті. Күн жылыған соң, саябақтың құрылысын бастау көзделіп отыр.
– Смета дайын. Жақын күндері конкурс жариялаймыз. Жобаға сәйкес, саябақ аумағы абаттандырылып, сахна маңына орындықтар қойылады. Сондай-ақ, мүмкіндігінше жасыл желек отырғызамыз. Өйткені ауылда ағаштар аз, – деп атап өтті әкім.
Ағаштар отырғызылған соң, оларды қаңғыбас малдан қорғау үшін арнайы қоршау орнатылады.
Горняцкийде қаңғыбас мал – өзекті мәселе. Ауылда арнайы мал қорасы болғанымен, тұрғындар әсіресе қыс мезгілінде малды бос жіберіп қояды. Бұл жас көшеттер мен абаттандырылған жерлерге зиян келтіреді.
– Мал иелеріне бірнеше рет ескерту жасалды. Егер мал көшеде қараусыз жүрсе, оларды айыппұл күтіп тұр (Әкімшілік құқық бұзушылық туралы кодекстің 505-бабы бойынша). Бірақ бұл шаралар әзірге нәтиже беріп жатқан жоқ, – деді Зейнелғабиден Әбілов.
Қаңғыбас иттер де үлкен мәселе болып отыр. Ауыл тұрғындары иттердің адамдарға жиі шабуылдайтынын айтып, шағымдануда.
– Иттерді аулап, стерилизация жасап, вакцинациялап, қайта жібереді. Бірақ мәселе шешілмейді. Көктем басталысымен, қаңғыбас иттер бұрынғыдан да көп қауіп төндіре бастайды. Биыл бұл қызметті Қостанайлық компания жеңіп алды. Біз оларға хабарласамыз, бірақ жұмыс істеп жатқанын көрмейміз. Мүмкін, бүкіл облысты қамтуға үлгермей жатқан шығар, – дейді әкім.
Горняцкийде қоқыс шығару мәселесі де біртіндеп шешіліп келеді. Бұрын бұл үлкен проблема болған. Бірақ қазір жағдай тұрақталды.
– Қазір ауылда қоқыс уақытында шығарылып жатыр. Одан бөлек, пластикалық бөтелкелерді жинау үшін арнайы контейнерлер орнатылды, – деді әкім.
Биыл Горняцкий ауылында жылу жүйелерін жөндеу жұмыстары жалғасады. Жоспарға сәйкес, 4,2 шақырым құбырды ауыстыру көзделіп отыр.
Жалпы, ауылда инфрақұрылымды жақсарту, абаттандыру және тұрғындардың өмір сүру жағдайын көтеру бағытында бірқатар маңызды жобалар жүзеге асырылуда.
Брифингті аяқтай келе Зейнелғабиден Әбілов Горняцкий мен Перцевка тұрғындарын толғандыратын басқа мәселелер жұмыс барысында шешілетінін айтты. «Адамдар үшін қажетті нәрселердің бәрін жасаймыз», – деп атап өтті ол.
Зейнелғабиден Әбілов 2021 жылдың 27 шілдесінде аким қызметіне кіріскен болатын. Тұрғындар өз акиміне, оның жұмысына, адамдарға деген қарым-қатынасына риза. Оның өкілеттігі шілде айында аяқталатыны туралы хабар тұрғындарды аса қуантпағаны анық.
– Тұрғындар маған: «Сізді ешқайда жібермейміз» дейді. Әріптестерім де қолдау білдіріп жатыр, біз көп жұмыс атқардық. Мен ой үстіндемін. Өзіме ұнайтын ісіме көңіл бөлуге тырысамын – өйткені мен мәдениет адамымын. Ал мемлекеттік қызметте өзіңе тиесілі емессің, мәдениетке қатысты барлық нәрсе қиынға соғады. Кейде өзім үшін өмір сүруді де қалайсың. Жалпы, ойланып көремін, уақыт әлі бар, – деп түсіндірді Зейнелғабиден Әбілов.
Жәнібек ҚАЛАБАЕВ,
суреттерді түсірген
Сұлтан СЕРТАЕВ