Нұр мешітінде дәстүрге айналған «Имани жаз — 2025» жазғы сауат ашу курсы басталды
Аталған курс – лагерь жыл сайын балалардың жазғы демалысын пайдалы өткізіп, дінге баулуына арналған. Бұл 3 апталық курста 8 бен 15 жас аралығындағы бозбалалар мен бойжеткендер имандылыққа, Құран әліппесін оқуға және әдептілікке үйренеді.
— Жыл сайын өтетін жазғы курс 9 маусымнан 30 маусымға дейінгі аралықта өтеді. Сабақтар дүйсенбіден жұмаға дейін, таңғы 10:00-ден 13:00-ге дейін жүргізіледі. Сенбі және жексенбі – демалыс күндері. Ұлдар мен қыздарға арналған екі бөлек топ бар. Қазіргі таңда қыздар тобында 10-ға жуық бала тіркелген, — дейді Рудный қалалық мешітінің ұстазы Темірлан Бақай.
Бұл курстың ерекшелігі жас буынға ислам дінін жеңіл, түсінікті тілмен үйрету. Сабақтар барысында имандылық, мінез-құлық әдебі, үлкенге құрмет, кішіге ізет сынды рухани құндылықтар кеңінен қамтылады.
Сонымен қатар, курс аясында жас жеткіншектер үшін түрлі танымдық әрі көңілді демалыс іс-шаралары ұйымдастырылады: паркке бару, кинотеатрға апару сынды уақытты тиімді өткізудің жолдары қарастырылғанын Темірлан ұстаз атап өтті.
— Алдағы уақытта балаларға арналған қоғамдық-мәдени демалыс түрлері қарастырылып жатыр. Оқушыларымызды паркке серуендеуге немесе кинотеатрға алып баруды жоспарлап отырмыз, — ұстаз Темірлан Бақай.
— Ата-аналар баласын мешітке өздері әкеліп, өтініш білдіреді. Бұл курс — жазғы демалысты пайдалы өткізуге, жат ағымнан алшақ болуға, иманды жастарды тәрбиелеуге үлкен үлес қосатын бағдарлама, — дейді Нұр мешітінің әйел-қыздар секторының ұстазы Перизат Жәнібекқызы.
«Имани жаз» жай ғана курс емес, ұрпақ тәрбиесіне арналған рухани алаң. Ислам дінінің негіздерін үйретіп қана қоймай, адамгершілік пен ізгілікті бойға сіңіретін бұл шара – бүгінгі баланың ертеңгі болмысына бағыт-бағдар болары анық. Курсқа жазылу үшін мешіт әкімшілігіне немесе әлеуметтік желілерлегі парақшаларға жазуға болады.
Арай АХМЕТ,
суретті түсірген
Даулет КУЛАТАЕВ