Виктор Ионенко 2024 жылдың 11 айындағы қаланың әлеуметтік-экономикалық дамудың қорытындылары туралы есеп берді
Рудный қаласының әкімі Виктор Ионенко қаланың әлеуметтік-экономикалық дамуының негізгі көрсеткіштері мен жетістіктерін әкімдікте өткен кеңесте талқылады. Жиында «Рудный қалалық экономика және бюджеттік жоспарлау бөлімі» ММ басшысы Зоя Жигунова қаланың негізгі бағыттары бойынша дамудың оң динамикасын атап өтіп, 11 айдағы көрсеткіштерді орындау жоспарлары бойынша атқарылған жұмыстар туралы есеп берді.
ҚАЛАНЫҢ ӨНЕРКӘСІПТІК ӘЛЕУЕТІ
Рудный қаласы Костанай облысы экономикасының маңызды өнеркәсіптік орталығы болып табылады. Қала облыс көлеміндегі өнеркәсіптік өндірістің 25,2%-ын құрайды. 2024 жылдың 11 айында қалада 646 миллиард теңгенің өнеркәсіп өнімі өндіріліп, өткен жылмен салыстырғанда 10,8%-ға өсу байқалды. Өнеркәсіптің басым бөлігі қаланың екі ірі кәсіпорны – «ССКӨБ» және «Қашар руда» АҚ-на тиесілі, олардың үлесі өнеркәсіп өндірісінің жалпы көлемінің 76%-ынан асады.
Әкімдік өнеркәсіпті әртараптандыру және шағын және орта бизнесті дамыту бағытында маңызды жұмыстар атқаруда. Жыл ішінде жеке инвестициялардың арқасында 2,7 миллиард теңгеге 10 жоба іске асырылып, 182 жаңа жұмыс орны ашылды. Сонымен қатар, 18 жаңа жобаны жүзеге асыру жоспарланып отыр, олардың ішінде 11 жоба өнеркәсіп саласын, 7 жоба сауда саласын дамытуға бағытталған. Бұл жобалар 800-ден астам жаңа жұмыс орнын ашуға мүмкіндік береді.
Ең ірі жобалардың бірі – «ССКӨБ» АҚ жүзеге асыратын жылына 4 миллион тонна шойын шығаратын ыстық брикеттелген темір зауытының құрылысы. Жоба аяқталғаннан кейін 500 жаңа жұмыс орны ашылады.
ИНФРАҚҰРЫЛЫМДЫ ДАМЫТУ
Қаланың инфрақұрылымын дамыту аясында жылу және су желілерін жаңарту жұмыстары жалғасуда. 2024 жылы жылу желілерін жөндеуге 9,5 миллиард теңге бөлініп, 20,1 шақырым желі жөнделді. Бұл өткен жылмен салыстырғанда 7 шақырымға артық. Нәтижесінде магистральдық желілердің тозу деңгейі 8,9%-ға, ал кварталдық желілердің тозуы 5,9%-ға төмендеді.
Сондай-ақ, сумен жабдықтау және канализация желілерін жөндеуге 3,2 миллиард теңге бөлініп, 30,5 шақырым желі жөнделді. 2025 жылы бұл жұмыстар жалғасын тауып, қосымша 28,7 шақырым су құбыры мен 8 шақырым канализация желісі жаңартылады.
2024 жылы қалада инженерлік желілерді жаңғырту бойынша ауқымды жұмыстар жалғастырылды. Атап айтқанда, 11-ші және 19-шы шағын аудандарда құрылыс нысандарына инженерлік желілерді тарту мәселелері шешілді. Жылу және сумен жабдықтау бойынша құрылыс-монтаж жұмыстары толығымен аяқталды, ал электрмен жабдықтау және су бұру жобалары жақын арада аяқталуы жоспарланған. Сонымен қатар, 19-шы шағын ауданда көпқабатты 12 тұрғын үй салу жоспары қабылданып, қазіргі таңда 2 үйдің құрылысы басталды.
ҚҰРЫЛЫС ЖӘНЕ ТҰРҒЫН ҮЙ САЯСАТЫ
2024 жылдың 11 айында қалада 42,7 мың шаршы метр тұрғын үй пайдалануға берілді, бұл өткен жылмен салыстырғанда 10,8%-ға артық. Сонымен қатар, жеке инвестициялар есебінен үш тұрғын үй салынды, ал тағы төртеуінде қайта жөндеу жұмыстары жүргізілуде.
19-шағын ауданда 12 көпқабатты тұрғын үйдің құрылысы жоспарланып, олардың екеуінде құрылыс басталды. Мемлекеттік тұрғын үй қорына 430 пәтер сатып алынды, бұл кезектегі тұрғындар санын 5,5 мыңнан 4,3 мың адамға дейін қысқартуға мүмкіндік берді.
Қаланың жарықтандыру мәселесі де назардан тыс қалмады. 79 көшеде жарықтандыру жүйелері жаңартылып, 584 шам мен 204 тірек орнатылды. Сонымен қатар, 16 спорт алаңы салынды, бұл қалалықтардың бос уақытын тиімді өткізуіне оң әсерін тигізді.
ЖОЛ ЖӘНЕ КӨЛІК ИНФРАҚҰРЫЛЫМЫ
Қалалық жолдарды жаңғырту – әкімдіктің негізгі міндеттерінің бірі. 2024 жылы қала жолдарын жөндеуге 2,9 миллиард теңге бөлінді, бұл өткен жылмен салыстырғанда 6,5 есе көп. Бұл қаржыға 30 мың шаршы метр жол ағымдағы жөндеуден өтті, сондай-ақ бірнеше негізгі көшелерде жұмыстар жүргізілді. Осы қаражат аясында негізгі бес көшені қайта құру жұмыстары басталды. Сонымен қатар, ішкі орам жолдарына орташа жөндеу жұмыстары жүргізіліп, әлеуметтік нысандарға кіреберіс жолдар жақсартылды. Екі жол қиылысында жаңа бағдаршамдар орнатылды, бұл жол қозғалысы қауіпсіздігін айтарлықтай арттыруға мүмкіндік берді.
БІЛІМ БЕРУ ЖӘНЕ ДЕНСАУЛЫҚ САҚТАУ САЛАЛАРЫ
Қалада екі жаңа мектептің құрылысы жүргізілуде: 11-шағын ауданда 900 орындық мектеп және 1200 орындық мектеп «Самрұқ Қазына» қоры мен ERG компаниясының қолдауымен салынып жатыр. Сонымен қатар, жеке инвестициялар есебінен 200 орындық балабақша ашылып, тағы бір балабақшаның құрылысы жалғасуда.
Денсаулық сақтау саласында жүктемені азайту үшін 250 адамды қабылдай алатын жаңа емхана салу жоспарлануда. Бұл жоба 2025-2026 жылдар аралығында жүзеге асырылады.
СПОРТ ЖӘНЕ МӘДЕНИЕТ
Қалада 16 жаңа спорт алаңы салынды. Сонымен қатар, екі дене шынықтыру-сауықтыру кешені мен 1500 орындық стадионның құрылысына жобалық-сметалық құжаттама әзірленуде.
Виктор Ионенко халықпен бірлесіп атқарылған жұмыстардың маңыздылығын атап өтті:
«Біз тек бизнестің қолдауымен және тұрғындардың белсенді қатысуымен ғана қаламыздың тұрақты дамуын қамтамасыз ете аламыз. Баршаңызды қаланың өркендеуіне өз үлестеріңізді қосуға шақырамын. Бірлескен күш-жігерімізбен біз Рудныйды баршамыз үшін жайлы әрі тартымды қалаға айналдырамыз.»
Бұл жұмыстар Рудный қаласының әлеуметтік-экономикалық даму қарқынын арттыруға бағытталған жүйелі және кешенді шаралардың маңызды бөлігі болып табылады. Биыл атқарылар жұмыс жоспары ауқымды. Сондықтан,қалада әр сала бойынша өзгерістер жалғасын сәтті табады деп сенеміз.
Аякөз ҚОЖАБЕКОВА,
суретті түсірген Сұлтан СЕРТАЕВ