«Старт» телемектебі қалам мен фотошеберлерін тәрбиелеуде
«Старт» студиясы 1997 жылы Рудный қаласындағы мектеп-лицей базасында құрылды. Студия жұмысы кейде үзіліп тұрса да, негізінен тұрақты түрде жұмыс істеп келеді. 2016 жылға дейін бірнеше рет орын ауыстырды, қазір студия Качарская көшесі, 49 мекенжайындағы «Балалар тәрбиелеу – сауықтыру кешенінің» құрамында. Бұл қаланың қосымша білім беру жүйесінің бір бөлігі болып табылады. Студияны тәмамдаған оқушыларға білім бөлімінің басшысы қол қойған сертификат беріледі.
Бұрын студияға 14 жастан бастап балалар қабылданатын, ал оқу бағдарламасы «Журналистика» деп аталып, балалар тек журналистиканы ғана емес, фото және бейнетүсірілімді де меңгеретін. 2018 жылдан бастап студияда елеулі өзгерістер орын алды. Техникалық жабдықтар жеңілдеп, қолжетімді бола түсті.
«Бұрын бізде гендерлік бөлініс болатын. Ұлдар негізінен оператор болып жұмыс істейтін, ал қазір бұл ұстаным жоқ. Біз қыздар мен ұлдарға бірдей үйретеміз. Олар фотоға түсіріп, видео жасап, монтаждауды меңгереді. Кейбіреуі жақсы жазады, кейбіреуі керемет фото түсіреді. Әр баланың өз қабілеті бар, сондықтан біз барлығына мүмкіндік береміз. Қазіргі таңда Рудныйда ерекше дарынды балалар көп», – дейді «Старт» студиясының жетекшісі Игорь Дайкер.
2018 жылдан бастап студияда көптеген өзгерістер орын алды. Тек техникалық жабдықтар ғана емес, бағдарлама да өзгерді. Енді студия «Телемектеп» деп аталып, 8 жасар балаларды да қабылдай бастады. Бұл эксперимент жас ерекшеліктерінің сабақтастығын қалыптастыру мақсатында жүргізілді. Жоғары сынып оқушылары өз білгендерін кішілерге үйретеді.
Студия түрлі жарыстарда жоғары жетістіктерге жетіп, тек жергілікті және республикалық деңгейде ғана емес, халықаралық аренада да танымал болуда. Мәскеу мен Санкт-Петербургте жүлделі орындарға ие болды. 2018 және 2019 жылдары студия оқушылары «Артек» лагерінде болды. Сонымен қатар, Алматыдан да бес жүлделі орынмен оралды. Жыл сайын «Юнга» фестиваліне қатысып, жүлделі орындарды иеленіп келеді.
«Қазіргі балалар – «смартфон балалары». Телефоннан бас көтерту қиын, студияға келу де қиын. Қыркүйектен қарашаға дейін теориялық сабақтар өтеді, осы уақыт ішінде әр баланың қызығушылығы мен дүниетанымы анық байқалады. Өкінішке қарай, қазіргі балалардың дүниетанымы тар, олар қарапайым нәрселерді білмейді. Журналистикамен айналысатын адам жақсы мен жаманды айыра білуі керек, бірақ бүгінгі 15-16 жастағы балалардың өзі мұны түсінбейді», – деп атап өтті педагог.
«Старт» студиясы көпшілікке деректі фильмдер ұсынды. Олардың ішінде «Атамұра – Наследие» және «Панацея» сериалдары бар, олар халықаралық байқауларда гран-при иеленді. Студияда жасалған алғашқы деректі фильмдерге сену қиын болды, бірақ зерттеу процесі балалардың қызығушылығын оятты.
«Барлығы 9 мамырда студияда отырып, бір оқушының «Жеңіс күні – біздің мереке емес, ол бізге қатысы жоқ» деген сөзінен басталды. Оқулықта тек үш бет жазылған. Біз балаларға бұл тақырыпты тереңірек түсіндіру үшін материалдар жинап, тың ақпарат таптық», – дейді Игорь Дайкер.
Рудный қаласындағы №7 және №3 мектептерде осы студия үлгісінде ұқсас жобалар іске қосылды. Бүгінде балалардың сөйлеу және есте сақтау қабілеттерін дамыту үшін шағын телебағдарламалар жасалады. Оқушылар сценарий жазып, ертегілер мен мини-спектакльдер қояды. 14 жастан бастап оқушылар журналистикаға ауысып, қоғамтану мен телевизия негіздерін үйренеді. Олар сюжеттер түсіріп, бағдарламалар жасап, монтаждауды меңгереді.
Техникалық құралдар көмегімен балалар ақпарат жинап, оны өңдеуді үйренеді. Көптеген оқушылар көркем және деректі фильмдер түсіріп, блог жүргізеді, музыкалық клиптер жасайды. Бұл олардың шығармашылық дамуына зор мүмкіндік беруде.
Айбар БЕРІК,
суретті түсірген автор