Рудный қаласының әкімі Виктор Ионенконың төрағалығымен өткен кеңейтілген отырыста мемлекеттік сатып алулардағы өзгерістер мен қаржы қаражатын игеру мәселелері қаралды. Қаржы бөлімінің басшысы Сержан Асанов жаңа заңның енгізілуіне байланысты қандай жаңашылдықтар барын түсіндірді.
1 қаңтардан бастап күшіне енген «Мемлекеттік сатып алу туралы» жаңа заң сатып алу процестерін оңтайландырып, ашықтықты арттыруға бағытталған. Енді 100 АЕК-ке дейінгі тауарлар, 500 АЕК-ке дейінгі жұмыстар мен қызметтер бір көзден, тікелей шарт жасасу арқылы сатып алынады. Ауылдық округтер, кенттер мен аудандық маңызы бар қалалар әкімдіктері үшін бұл шек 4000 АЕК-ке дейін ұлғайтылды. Сондай-ақ, 1000 АЕК-ке дейінгі сатып алуларда брендтік атауларды көрсетуге рұқсат берілді. Ашық конкурстардың мерзімі 60 күннен 30 күнге қысқарса, баға ұсыныстарын сұрату екі жұмыс күнінде аяқталатын болды. Бұдан бөлек, сатып алу тәсілдерінен тауар биржалары, екі кезеңдік конкурс және негіздемелік келісімдер алынып тасталды.
– Процедураларды бірыңғай ұйымдастырушы жүргізеді. Алдын ала рұқсат беру талабы да жойылды. Бұл бюджеттік қаражатты игеру процесін едәуір жеңілдетеді, – деді Сержан Асанов.
Қаржы бөлімінің мәліметінше, Рудныйда 3 ақпанға дейін жалпы сомасы 4,719 млрд теңгеге 20 мемлекеттік сатып алу рәсімі жоспарланған. Оның ішінде 4,046 млрд теңгеге 12 конкурс жарияланып, төртеуі аяқталған. Қазіргі уақытта 130 млн теңгеге екі өтінім қарастырылып жатыр. Олардың бірі – 74 млн теңгеге көше жарығын күтіп ұстау және диспетчерлік жүйені басқару қызметіне қатысты өтінім жетілдіруге қайтарылған. Екінші өтінім – 56 млн теңгеге гараж кооперативі №6 ауданындағы 35/6 кВ қосалқы станциясын жөндеу қызметіне арналған, ол мемлекеттік сатып алу порталында жариялау сатысында тұр.
Сонымен қатар, күнделікті қажеттіліктерге арналған жұмыстар мен қызметтер бойынша өтінімдер түспеген. Мысалы, бағдаршамдарды күтіп-ұстауға 22 млн теңге, ал жол белгілерін орнатуға 16 млн теңге қарастырылған, бірақ бұл жұмыстарға әлі де тапсырыс берілмеген.
Қала әкімі Виктор Ионенко бюджеттік қаражаттың уақытында игерілуін қатаң бақылау қажеттігін атап өтті.
– Қазіргі таңда 5,2 млрд теңгені игеру үшін тағы 8 конкурсты жариялау қажет. Көптеген конкурстар тұрғын үй-коммуналдық шаруашылығы бөліміне қатысты. Сол себепті жұмыстарды кешеуілдетпей, нақты кестелерді әзірлеу керек. Қандай қиындықтар барын анықтап, оларды жою қажет. Облыстық бюджеттен бөлінген 6,7 млрд теңгені де тиімді пайдалануға тиіспіз. Егер уақытында іске кіріспесек, бұл қаражат басқа өңірлерге қайта бөлініп кетуі мүмкін, – деді қала басшысы.
Әкімнің айтуынша, кешіктірілген конкурстар мемлекеттік бағдарламалар мен қаланы дамыту жоспарларына теріс әсер етуі мүмкін. Егер жұмыстар жазда басталмаса, олар күзге қалдырылуы ықтимал. Бұл, әсіресе, биыл Қашарда қолға алынатын күрделі жөндеу жұмыстарына қатысты өзекті. Кентте әкімдік ғимаратын және жастар мен ардагерлер орталығын жөндеуге 180 млн теңге бөлінген. Сондай-ақ, 400 млн теңге жолдарды асфальттауға жұмсалмақ.
– Әр басшы бөлінген қаржыны уақытылы және дұрыс игеру үшін жеке жауапкершілік алады. Егер кестелер кешіктірілсе, жұмыстар уақытында аяқталмайды. Барлық процесс заң талаптарына сәйкес жүргізілуі керек. Ал байқауларды уақытында жариялау және шарттарды мерзімінде жасасу – басты міндетіміз, – деді Виктор Ионенко.
Қаржы басқармасы мен әкімдік мемлекеттік сатып алулардың уақтылы өткізілуін бақылауды күшейтіп, барлық жауапты тұлғаларға жұмыстарды тездетуді тапсырды. Егер мердігерлер ертерек анықталса, қажетті материалдарды алдын ала сатып алу мүмкіндігі де болады. Бұл өз кезегінде жұмыстардың сапалы және мерзімінде аяқталуын қамтамасыз етеді.
Гүлім МҰРАТ,
суретті түсірген
Сұлтан СЕРТАЕВ