Рудныйлық шорт-трекшілер лайықты марапатқа ие болды
«Горняк» мұз аренасында Сергей Яковлевич Ананич Кубогына арналған хоккей турнирінің ашылуы өтті. Бұл шарада қала әкімі Виктор Ионенко жергілікті шорт-трекшілерді жоғары жетістіктерімен құттықтады.
Глеб Ивченко, Анастасия Галечина және Полина Омельчук – Қазақстанның және әлемдік аренаның мықты спортшылары. Олар халықаралық жарыстарда үздік нәтиже көрсетіп, Рудный қаласының атын асқақтатты.
Глеб Ивченко IX Қысқы Азия ойындарында алтын медаль жеңіп алып, Миландағы Әлем кубогында қола жүлдеге ие болды. Анастасия Галечина мен Полина Омельчук Қазақстан құрамасының сапында өнер көрсетіп, Канаданың Калгари қаласында өткен жасөспірімдер арасындағы әлем чемпионатында күміс медаль алды. Сондай-ақ, Анастасия 2000 метрлік аралас эстафетада қола жүлдегер атанды.
Турнирдің ашылу салтанатында қала әкімі спортшылар мен олардың бапкерлеріне ақшалай сертификаттар табыстады. Глеб Ивченко – 1 000 000 теңге, Анастасия Галечина мен Полина Омельчук – 700 000 теңгеден, ал олардың бапкері Николай Федоренко – 500 000 теңге алды.
Анастасия Галечина мен Полина Омельчук спортқа қалай келгені және болашақ жоспарлары туралы айтып берді.
Рудныйлық спортшыларға қолдау тек қалада ғана емес, облыстық деңгейде де көрсетілуде. Қостанай облысы Дене шынықтыру және спорт басқармасының басшысы Дулат Советханұлы шорт-трекшілермен кездесіп, оларды қажетті жабдықтармен, медициналық көмекпен және реабилитациямен қамтамасыз ету мәселелерін талқылады.
Сонымен қатар, Қостанай облысының әкімі де спортшылармен кездесіп, олардың жетістіктерін жоғары бағалады. Глеб Ивченко Олимпиада ойындарына дайындалып жатқанын, басты мақсаты – осы жарыста Қазақстанды лайықты таныстыру екенін атап өтті. Өз кезегінде, облыс әкімі болашақта жоғары жетістіктерге жеткен спортшылар үшін арнайы стипендиялар бөлінетінін айтты.
Облыс әкімі Құмар Ақсақаловта жас спортшыларды жеңістерімен құттықтай отырып, Қостанай облысының дене шынықтыру және спортты дамытуға қосқан үлесі үшін әрқайсысына 1 500 000 теңгеден, ал жеке жаттықтырушыларына 2 000 000 теңге қаржылай сыйлық тарту етті.
Қазіргі уақытта спортшылар жарыс маусымын аяқтап, қалпына келтіру кезеңінен өтуде. Алдағы уақытта олар оқу-жаттығу жиындарына қатысып, маңызды жарыстарға дайындықты бастайды.
Рудный мен Қостанай облысында шорт-трек спорты қарқынды дамып келеді. Жергілікті билік пен бапкерлердің қолдауы спортшылардың жоғары нәтижелер көрсетуіне мүмкіндік беруде. Алдағы жарыстарда біздің спортшыларымыз тағы да ел намысын абыроймен қорғайды деп сенеміз!
Анастасия Галечина:
«Мен шорт-трекке 10 жыл бұрын келдім. Бұл спорттың жылдамдығы мен динамикасы бірден баурап алды. Алғашқы жылдары қиындықтар болды, бірақ мен ешқашан берілмедім. Қазір Олимпиада маусымына дайындалып жатырмын, алдағы Қазақстан чемпионатында үздік нәтиже көрсеткім келеді».
Полина Омельчук:
«Мен 2014 жылы бірінші сынып оқып жүргенде шорт-трекке келдім. Әкем мені осы спортқа алып келді, содан бері бұл менің өмірімнің маңызды бөлігіне айналды. Маған жарыстарға қатысу, адреналинді сезіну ұнайды. Қазір жаңа жарыстарға дайындалып жатырмын және алдағы уақытта одан да жоғары нәтижелерге қол жеткізгім келеді».
Аякөз ҚОЖАБЕКОВА,
суреттерді түсірген
Сұлтан СЕРТАЕВ