Қаламыздың спортшылары жекелей және командалық жарыстарда жүлделі орындарға ие болды
20 наурыздан бастап Қазақстан Республикасының VI қысқы Спартакиадасы шорт-трек бойынша өз жалауын көтерді. Бұл додаға еліміздің түкпір-түкпірінен келген үздік спортшылар қатысып, өздерінің шеберліктерін көрсетті. Байрақты бәсекеде Рудный қаласының спортшылары да жоғары нәтиже көрсетіп, жүлделі орындарға ие болды.
Жеке жарыстарда Анастасия Галечина 1000 метрлік қашықтықта қола жүлдеге ие болды. Бұл оның жарыстардағы ең жоғары деңгейдегі нәтижелерінің бірі болды.
Командалық сайыстарда да рудныйлық спортшылар өздерінің жоғары дайындығын көрсетті. 3000 метрлік әйелдер эстафетасында қола жүлдені Полина Омельчук, София Симакова, Анастасия Назаева және Виктория Марар иеленді.
Сонымен қатар, 2000 метрлік аралас эстафетада Рудный спортшылары үшінші орынға ие болды. Бұл сайыста Никита Костюк, Глеб Ивченко, Анастасия Галечина, Полина Омельчук және София Симакова өнер көрсетті.
Бұл жетістіктер – спортшылардың қажырлы еңбегі мен жаттықтырушылардың үздіксіз дайындығының нәтижесі.
Рудный қаласының әкімі Виктор Ионенко өз әлеуметтік желісінде спортшыларымызды құттықтап, олардың жетістіктеріне жоғары баға берді:
«Сіздердің жеңістеріңіз – жаттықтырушылардың тынымсыз еңбегінің, сіздердің еңбекқорлықтарыңыз бен спортқа деген сүйіспеншіліктеріңіздің нәтижесі. Сіздерді лайықты жеңістеріңізбен шын жүректен құттықтаймын! Денсаулық, жаңа белестер мен сенімді қадам тілеймін!»
Айта кету керек, Рудный спортшылары тек республикалық ғана емес, халықаралық деңгейдегі жарыстарда да жоғары нәтиже көрсетіп келеді.
- Глеб Ивченко 2025 жылғы Азия ойындарында 5000 метрлік эстафетада Қазақстан құрамасының құрамында алтын медаль жеңіп алды. Бұл – Қазақстан шорт-трек тарихындағы алғашқы алтын жүлде.
- Полина Омельчук Канадада өткен жасөспірімдер арасындағы әлем кубогы кезеңінде аралас эстафетада күміс жүлде иеленді.
Біздің спортшыларымыздың табыстары – олардың қажырлы еңбегінің, жаттықтырушылардың қолдауының және қаламыздағы спорттық инфрақұрылымның дамуының жемісі. Біз оларға мақтанамыз және алдағы жарыстарда жаңа жетістіктерге жетулеріне тілектеспіз!
Гүлім МҰРАТ,
cуреттерді ұсынған
қала әкімдігінің баспасөз хатшысы