Қаржы бөлімінің басшысы қаладағы маңызды жобалар мен сатып алу рәсімдері туралы мәлімдеді
Рудный қаласының әкімі Виктор Ионенконың төрағалығымен өткен кеңесте қалалық қаржы бөлімінің басшысы Сержан Асанов мемлекеттік сатып алу рәсімдері мен олардың орындалуы туралы толық есеп берді. Оның баяндамасында биылғы мемлекеттік сатып алу шараларының барысы мен тәуекелдері, сондай-ақ сатып алу процесін тездету бойынша ұсыныстар айтылды.
Қазіргі уақытта Рудный қаласында мемлекеттік сатып алу рәсімдері бойынша 53 өтініш қабылданған. Олардың 34-і бойынша рәсімдер сәтті аяқталған, 15 өтініш бойынша жұмыстар әлі жалғасуда, ал 4 өтініш бойынша сатып алу рәсімдері жақында жарияланатын болады. Қаржы бөлімінің басшысы бұл жұмыстардың бәрі қала мен оның тұрғындары үшін маңызды екенін атап өтті.
«Қазіргі таңда мемлекеттік сатып алу рәсімдері орта есеппен 30 күнді алады. Алайда, бұл процеске көптеген факторлар әсер етуі мүмкін. Мысалы, кейбір жағдайларда жұмыстарды орындау, тауарларды жеткізу немесе қызмет көрсету мерзімдері ұзарады. Бұл өз кезегінде белгіленген мерзімдерден асып кету тәуекелін туғызады», – деп атап өтті Сержан Абдикаримович.
Бөлім басшысы қаланың даму жоспарына сай бірқатар маңызды жобаларды атап өтіп, оларды жүзеге асыру барысын баяндады. Бұл жобаларға Качар ауылындағы көше жолдарын орташа жөндеу, Рудный қаласындағы жылу жүйелерін жөндеу және тұрғын үйлерде лифтілерді ауыстыру жұмыстары кіреді. Сонымен қатар, «Перцевка» елді мекенінде көше жолдарын орташа жөндеу бойынша сатып алу рәсімі қайта жарияланған.
«Мемлекеттік сатып алуларға қатысушы тараптар үшін барлық жұмыстарды уақытылы орындау аса маңызды. Себебі, кейбір жобалардың мерзімдері ұзарып, жобаларды орындауға кететін уақыт ұзаруы мүмкін», – деді қаржы бөлімінің басшысы.
Асанов сонымен қатар жылдам сатып алу процесі туралы да ақпарат берді. Егер сатып алынатын тауарлар мен қызметтер 31,4 миллион теңгеден аспайтын болса, онда сатып алу рәсімдері тек екі жұмыс күні ішінде жүзеге асырылады. Бұл әдіс сатып алу процесін тездетіп, тиімділігін арттыруға мүмкіндік береді. Алайда, мұндай жағдайларда баға негізгі фактор ретінде қарастырылады.
«Жылдам сатып алу әдісін қолдану арқылы мемлекеттік тапсырыстарды тиімді әрі жылдам орындауға болады. Біз осы әдісті қолдана отырып, бюджетті тиімді пайдалану жолдарын қарастыруымыз керек», – деді Асанов.
Бөлім басшысы есеп беру барысында сатып алу рәсімдерінің уақытында жүзеге асырылмауының тәуекелдері мен салдарлары туралы да айтып өтті. Бұл ретте, сатып алулардың уақытылы және тиімді жүргізілуін қамтамасыз ету үшін барлық мемлекеттік мекемелер мен олардың құрылымдық бөлімшелері шаралар қабылдауы қажет екенін атап өтті.
Гүлім МҰРАТ,
суретті түсірген
Айбек БЕРІК