Қалалық қоғамдық кеңестің кезекті отырысы өтті
Отырыс барысында қалалық жұмыспен қамту және әлеуметтік бағдарламалар бөлімінің басшысы Елена Скаредина жаңа әлеуметтік көмек түрлерін ұсыну, оның мөлшерін анықтау және мұқтаж азаматтар санатын белгілеу туралы жоспарланған өзгерістер мен толықтырулар жөнінде баяндама жасады.
Облыстық жұмыспен қамту және әлеуметтік бағдарламаларды үйлестіру басқармасының ауызша тапсырмасына сәйкес, жұмыспен қамту бөліміне жаңа әлеуметтік көмек түрлерін қарастыру қажет болды. Атап айтқанда, бірінші топтағы мүгедектерге санаторлық-курорттық емдеу бойынша алып жүретін тұлғалардың шығындарын өтеу. Бұл жеке реабилитация және абилитация бағдарламасына сәйкес жүзеге асады. Көмек бір адамға жылына бір рет, нақты шығындардың 70 пайызы мөлшерінде, тұрғын үй және тамақтану шығындарын өтеу үшін беріледі. Емдеу процедуралары бұл көмекке кірмейді.
Сонымен қатар, Ұлы Отан соғысының ардагерлеріне, басқа да ардагерлер мен тұлғаларға Қазақстан Республикасының шегінде санаторлық-курорттық емдеу бойынша нақты шығындарды өтеу қарастырылған. Бұл көмек жылына бір рет, кіріс деңгейіне қарамастан, кепілдендірілген сомадан аспайтын мөлшерде беріледі.
– Бірінші, екінші, үшінші топтағы мүгедектерге абилитация және реабилитацияның жеке бағдарламалары әзірленеді, онда санаторлық-курорттық емдеу көрсетіледі, – дейді Елена Скаредина. – Бірінші топтағы мүгедектер, яғни арбада жүретіндер үшін алып жүрушінің көмегі қажет. Алып жүрушінің шығындарының 70 пайызы өтеледі. Қазіргі уақытта әлеуметтік қызметтер порталында жолдаманың құны 302 600 теңгені құрайды, демек біз 211 800 теңгені төлейміз. Бұл қаражат облыстық бюджетте қарастырылған, бізге ақша бөлінді. Бұл шешім бүкіл Қостанай облысы бойынша қабылданды. Мүгедектер бұл шешімді көптен күткен еді. Жолдаманың құны 302 600 теңге, оны министрлік анықтап, жыл сайын бекітеді. Жалпы шығын сомасы 9,3 миллион теңгені құрайды. Қосымша екі миллион теңге қажет болады.
Ардагерлерге келетін болсақ, бұл санатқа Ұлы Отан соғысының ардагерлерінен бөлек, Ауған соғысының қатысушылары, Чернобыль апатының зардаптарын жоюға қатысқандар, концлагерь тұтқындары және басқа да тұлғалар кіреді. Биылғы жылдың 10 сәуіріндегі жағдай бойынша, 40 ардагер санаторлық-курорттық емдеумен қамтылады. Бұрын облыстық басқарма конкурс өткізген кезде, оны бағасы бойынша «Сары ағаш» санаторийі жеңіп алатын еді, бірақ бұл өте алыс және ыңғайсыз. Енді адамдар өздері қайда барғысы келетінін таңдай алады – «Сосновый бор», «Жайлау» немесе Алматы қаласы. Адам санаторлық-курорттық емдеуден өткенін құжаттармен растайды, оған белгіленген жолдама құны шегінде қаражат өтеледі, яғни 14 күнге 302 600 теңге жылына бір рет және Қазақстан аумағында. Бұл әлеуметтік көмек түріне облыстық бюджеттен 12,1 миллион теңге бөлінді.
Булат МУСИН,
суретті түсірген Алексей ФРОЛОВ