Ауқымды аумақты қамту үшін бұл жұмыстарға қала кәсіпорындары мен ұйымдары, жеке кәсіпкерлер, еріктілер, студенттер, сондай-ақ «ССГПО» АҚ тартылатын болады. Халықты ақпараттандыру әлеуметтік желілер мен бұқаралық ақпарат құралдары арқылы жүзеге асырылады. Қажетті құрал-жабдықтармен (қолғап, қоқыс салатын қаптар) қамтамасыз ету және қалдықтарды арнайы техникамен шығару қарастырылған.
Қала әкімі қатысуымен өткен кеңейтілген кеңесте Рудный қаласын абаттандыру және санитарлық тазалау жұмыстары туралы ТКШ бөлімінің басшысы Юрий Итемгенов баяндады.
Сенбілік бірнеше кезеңмен ұйымдастырылады. Бірінші кезең – мемлекеттік мекемелерге, заңды ұйымдарға және кәсіпкерлік нысандарына тиесілі аумақтарды бөлу. Екінші кезең – белгілі бір учаскелерді тазалауға жауаптыларды анықтау. Үшінші кезең – сенбілік күндерін белгілеу.
– 27 наурыздан бастап қалада көшелерді санитарлық тазалау жұмыстары басталады. Бағдарламаға келесі жұмыстар кіреді: ағаштар мен бұталарды кесу, бұтақтарды ретке келтіру; автожолдарды ағымдағы жөндеу, плиткалардың шөгу орындарын қалпына келтіру; тұрмыстық қалдықтарды жинау және шығару; жүргінші жолдары мен көгалдарды шаң мен кірден тазарту; бордюрлер мен ағаштарды әктеу; жас көшеттердің түбін қопсыту, – деп хабарлады ТКШ бөлімінің басшысы.
Ерекше назар қоқыс орындарының және аула аумақтарының тазалығына аударылады. Бұл жұмыстар ПКСК және қоқыс шығаратын ұйымдармен бірлесе атқарылады.
Кәсіпорындар, ұйымдар мен жеке кәсіпкерлер өздеріне қарасты аумақтарды таза ұстауды қамтамасыз етуі тиіс.
Бос тұрған ғимараттардың иелеріне учаскелерін ретке келтіру, ағаштар мен бұталарды қырқу, қоқысты тазалау қажеттігі туралы ескертулер жіберіледі.
Жеке сектор тұрғындарына үйдің қасбетіне, көшеге қараған жағына құрылыс материалдарын (темірбетон, тыңайтқыш, қоқыс) жинауға тыйым салынатыны ескертіледі. Бұл талапты орындамаған жағдайда полиция басқармасы алдымен ескерту жасап, кейін айыппұл салатын болады.
Қалада 146 балалар-спорт алаңы бар. Олардың көбісі қанағаттанарлықсыз жағдайда және тұрақты тазалау, жөндеу, дәнекерлеу жұмыстарын қажет етеді. Әзірге бұл алаңдарға қызмет көрсету бойынша келісімшарт жасалмағандықтан, ТКШ басшысы ПИТК мен қала тұрғындарын сенбілік өткізуге шақырды.
– ПИТК, қалалық ұйымдар мен белсенді азаматтарды балалар алаңдарын тазалау мен жөндеуге белсенді қатысуға шақырамыз. Үлкен жөндеу, дәнекерлеу жұмыстарын біз мердігерлер арқылы орындаймыз, ал кішігірім жұмыстарды, әсіресе қоқыс жинау ісін ПИТК тұрақты бақылауда ұстап, жүйелі түрде жүргізіп отыруы қажет, – деп атап өтті Юрий Итемгенов.
Ол сондай-ақ коммуналдық кәсіпорындар бұрын жасалған келісімшарттарға сәйкес күнделікті санитарлық тазалау және абаттандыру жұмыстарын жүргізіп жатқанын атап өтті. Атап айтқанда: көшелерді кірден, шаңнан және тұрмыстық қалдықтардан тазарту, жол қоршауларын және жол қозғалысын реттеу құралдарын жуу, нөсерлік кәріз жүйелерін тазарту, жасыл желектерге күтім жасау (ағаштардың тәжін қалыптастыру, бұтақтарды қырқу, бұталарды ретке келтіру, құрғақ ағаштарды жою, көгалдарды қалпына келтіру), гүлзарларға арналған аумақтарды дайындау.
– Сенбілік аясында мемлекеттік ұйымдар мен ПИТК тазалап жатқан қала мен қоғамдық аумақтардан қоқыс, бұтақтар мен жапырақтарды полигонға тегін шығару ұйымдастырылады. Қалдықтарды шығаратын ұйымдар пайдаланатын көліктер мен арнайы техниканың мемлекеттік нөмірлерін ұсынуы қажет. Жұмыстардың жүргізілуі мен қоқыс шығаруды ұйымдастыруды бақылау ТКШ бөліміне жүктеледі, – деп қорытындылады Юрий Итемгенов.
ТКШ бөлімінің басшысының баяндамасын түсіндіре отырып, қала әкімі Виктор Ионенко сенбіліктерде жиналған қоқысты шығару үшін қосымша техника бөлуді тапсырды. Рудный қаласының санитарлық тазалау жұмыстарын үйлестіру қала әкімінің орынбасары Қазбек Төлендиновке жүктелді.
– Кедергі келтіретін ешқандай фактор көріп тұрған жоқпын: техника бар, полигон мәселесі шешілген. Сондықтан барлық тұрғындарды өз аулаларында сенбілікке шығуға шақырамын. Балалар алаңдарына келетін болсақ: ПИТК-ны сенбіліктер ұйымдастырып, тәртіп орнатуға шақырамын. ТКШ бөліміне алаңдарға техникалық тексеріс жүргізіп, жақын арада қажет жерлерде дәнекерлеу жұмыстарын ұйымдастыруды тапсырамын. Балалар алаңдарында балалардың жарақат алуына жол берілмеуі тиіс, – деп түйіндеді Виктор Ионенко.
Гүлім МҰРАТ,
суретті түсірген
Сұлтан СЕРТАЕВ