Қазақстанда бір шаңырақ астында өмір сүріп жүрген түрлі ұлттар мен ұлыстардың бірлігі, ынтымағы басқа мемлекеттерге үлгі. Елімізде соңғы уақытта қазақша сөйлейтін өзге ұлт өкілдері айтарлықтай көбейіп келеді. Тілді жетік меңгерген әрбір жанның жеке әдіс-тәсілдері бар. Қаламыздағы ағылшын тілі мұғалімі Надежда Леонова мемлекеттік тілді қалай меңгерді?
Надежданы «полиглот» деп атауға толықтай негіз бар – ол үйреншікті орыс тіліне қоса, ағылшын тілін жетік меңгерген және соңғы уақытта қазақ тілінде ауызша және жазбаша сөйлеу тәжірибесін жетілдірді.
— Басқалар секілді мен де «қазақ тілін» мектепте оқыдым. Дегенмен нәтижесі көңіл көншітерлік бола қоймады. Кейін біздің Ыбырай Алтынсарин атындағы педагогикалық колледжге оқуға түскенде, қазақ тіліне деген махаббатымды оқытушыларым оятты. Сол сәттен бастап барлық мүмкіндіктерді бос жібермей, қазақ тілінде сөйлеуге, оқуға, жаңа нәрселерді үйренуді тырысамын. Мемлекеттік тілімізді жақсы көремін. Қиындықтары бар, дегенмен мен үшін қазақ тілі қызықты, әрі әдемі тіл. Мұғалімдерімнің қажырлы еңбегінің арқасында минималды біліммен оқып бастап, қазір еркін сөйлесіп, түсініп, жауап бере алатындай деңгейге жеттім. Әр нәрсе өз уақытымен, қаншалықты қиын болса да тоқтамаймын.Өйткені тілге құрмет — елге құрмет,, — дейді ол.
Надежда Константинов негізгі орта мектебінде ағылшын тілі мұғалімі болып жұмыс істейді. Педагогикалық мансабының басында ол қазақ тілінде оқытатын сыныптарда оқушыларға білім беріп, тілді үйренуге жақсы ықпалын тигізді. Яғни Надежда оқушыларына ағылшын тілі пәнінен сабақ берсе, ал шәкірттері ұстаздарына қазақ тілін үйреткен.
— Ерекше әдіс-тәсілдерім жоқ, менің ойымша қандай да бір тілді үйренгін келсе, ең бастысы көбірек оқып, сол тілде адамдармен араласуды арттыру керек. Және әрине таныс емес лексика, сөз тіркестерін, фразаеологизмдерді жазып алып, оқып, күнделікті өмірде қолдануға тырысқан абзал. Бастапқыда қысылдым, қате жіберуге алаңдадым, алайда қазір менің жіберген қателіктерім – менің тәжірибем екеніне көзім жетті. Қазір маған оңайырақ, айтарлықтай тілдік кедергі жоқ, сөзді қалай жалғап, айтар ойыңды жеткізер кезде қиындықтар кездесетіні сөзсіз. Алайда қазіргі таңда мұндай жағдайлар сирек болып тұрады, — дейді Надежда.
Қазіргі таңда Надежда тілдерді оқыту орталығына барып жүр. Орталық жұмысымен 2019 жылы латын әліпбиін оқып жүрген уақытта танысыпты. Кейін қазақ тілі курсына ауысқан, орталықта күні бүгінге дейін белсенді оқушылардың қатарында дәрістерден қалыс қалмайды.
Кейіпкеріміз “қалауын тапса, қар жанар” деген сөзді іс жүзінде дәлелді. Әрине, кез келген тілді үйрену оңай шаруа емес. Талап, еңбек, және, ең бастысы тілге құрмет керек.
Зарина ЖҰМАҒҰЛОВА