Наурыз – бұл көктемнің жаңаруы мен жасампаздықтың, ырыс пен берекенің бастауы. Бұл мереке қазақ халқы үшін тек күн мен түннің теңелуі ғана емес, сондай-ақ бірлік пен татулықтың, ұлттық құндылықтар мен дәстүрлердің жаңғыру кезеңі. Наурыз мерекесіне орай Рудный қалалық тілдерді оқыту орталығында ерекше іс-шара ұйымдастырылды. «Көктем жұлдыздары» атты мерекелік шараның мақсаты – орталықтың тыңдаушылары мен тіл жанашырларына ұлттық салт-дәстүрлерді кеңінен таныстырып, мерекелік көңіл-күй сыйлау, сондай-ақ қатысушылардың тұлғалық қабілеттерін дамыту.
Мерекелік шара дәстүрлі шашумен басталды.Іс-шара барысында ұлттық дәстүрлер мен мәдениетке ерекше көңіл бөлінді. Қатысушылар қазақтың көне дәстүрлерімен танысып, ұлттық ойындарға қатысты. Топтық сайыстар қызықты әрі тартысты өтті.
Жарысқа оқытушы Салтанат Дуспулова мен тыңдаушы Ксения Минаева «Көктем нұры» тобы, «Бірлік» тобы оқытушы Лаура Джамбырбаева мен тыңдаушы Ольга Степанова және «Бәйшешек» тобы оқытушы Кенжегүл Сарбасова мен тыңдаушы Максим Поршнев жұптары қатысты.
Сайыс 5 кезеңнен тұрды. Қатысушылар өздерін және топтарын таныстырды, қазақ халқының ұлттық дәстүрлері туралы білімдерін ортаға салды, өз өнерлерін көрсетті және қазақ тіліндегі мақал-мәтелдердің мағынасын талдады.
Қазақ тілі курсына қатысып жүрген көптеген тыңдаушылар мемлекеттік тілді меңгерудің маңыздылығын атап өтті. Олардың пікірінше, қазақ тілін білу – қазақстандықтар үшін үлкен артықшылық. Бұл еңбек нарығында да, күнделікті өмірде де қажет.
Орталықта қазақ тілін үйреніп жүрген тыңдаушылардың бірі – Максим Поршнев, «Евразия Стар» ЖШС-нің сату бөлімінің басшысы. Ол мемлекеттік тілді меңгеру қажеттілігі туралы өз пікірімен бөлісіп, мерекелік шара ұйымдастырушыларына өз алғысын білдірді.
«Мен қазақ тілін оқыту орталығында үйреніп жүргеніме бірнеше ай ғана болды. Сабақтар өте пайдалы әрі қызықты өтеді. Бұл мектеп бағдарламасын қайта жаңғыртуға мүмкіндік береді. Өкінішке қарай, мектепте тілді жақсы деңгейде үйреткен жоқ, бірақ қазіргі уақытта оның маңыздылығын жақсы түсініп отырмын. Жұмыста қазақ тілі көп қажет болмағанымен, болашақта оның маңызы арта түсетіні анық. Оның үстіне, менің бірінші мамандығым – аударма ісі, ағылшын тілі. Сондықтан тіл үйренуге деген қызығушылығым бұрыннан бар. Орталықта оқу екі рет өтеді, кесте барлығымызға ыңғайлы етіп жасалған. Әзірге жетістіктерім айтарлықтай көп болмаса да, грамматиканы қайта қарап, диалогтармен жұмыс істеп жатырмыз. Бүгінгі іс-шара жоғары деңгейде ұйымдастырылған. Қазақ халқының дәстүрлері туралы көп мағлұмат алдым, Наурыз мейрамы қарсаңында ұлттық мәдениетпен жақынырақ таныстым. Бұл өте керемет әсер қалдырды. Наурыз мерекесі – бұл тек жаңа жылдың бастауы ғана емес, сонымен қатар ұлттық мәдениетті жаңғырту, халықтың бірлігін нығайту күні»,- деп бөлісті «Бәйшешек» тобының мүшесі.
Тіл үйренушілер үшін мұндай мәдени іс-шаралар үлкен шабыт береді. Орталықтың тыңдаушылары қазақ тілінде ойларын еркін жеткізуге тырысып, тілдік дағдыларын шыңдауға мүмкіндік алды.
«КЕГОК» АҚ ұжымы қазақ тілі курстарына 2024 жылдың қыркүйегінен бері қатысып жүр. Бастапқыда 16 адам жазылған болатын, қазір 13 адам оқуды жалғастырып жатыр. Жақында ағылшын тілін де меңгеруді бастаған. Солардың бірі Ксения Минаева, «КЕГОК» АҚ-ның азаматтық қорғаныс, төтенше жағдайлар және мобилизациялық жұмыс бойынша маманы. Сайысқа өз жетекшісімен қатысып, қазақ тілін меңгерудің жұмыс барысындағы қажеттілігі туралы атап өтті:
«Мұғалімдеріміз өте тәжірибелі, нәтижесі де байқалады. Әсіресе, ауызекі сөйлеу тілім жақсарды, грамматиканы да жақсы түсініп келе жатырмын. Курстарға әріптестеріммен бірге қатысамыз. Бұл – жұмыс барысында қажет болғандықтан және жеке өзімнің қалауыммен жасалған қадам. Себебі біздің құжаттарымыз екі тілде жүргізіледі. Бүгінгі мерекелік шара маған қатты ұнады. Қазақ халқының дәстүрлері туралы көп жаңа ақпарат алдым. Бұған дейін де түрлі шараларға қатыстым: Республика күні, Тілдер форумы және басқа да іс-шаралар. Мұндай басқосулар өте пайдалы. Баршаңызды келе жатқан Наурыз мейрамымен құттықтаймын!»
Іс шарада Ольга Степанова Мұқағали Мақатаевтың «Үш бақытым» өлеңін жатқа оқып, ал «Бәйшешек» тобы «Қара жорға» биін орындап, оның тарихын баяндады. Бұдан бөлек, орталықтың мамандары қазақ халқының ерекше дәстүрлерінің бірі – «Бесікке салу» ғұрпын қойылым ретінде көрсетті. Бұл дәстүр қазақ халқының сәби тәрбиесіне деген ерекше көзқарасын, ұрпақ сабақтастығын айқындайды.
«Көктем жұлдыздары» мерекелік шарасы соңында Барлық қатысушылар алғыс хаттармен, естелік сыйлықтармен марапатталды. Орталық басшысы Жанат Балтақызы сөз сөйлеп, қатысушыларға ризашылығын білдірді:
«Бүгінгі шараның басты мақсаты – қазақтың мәдениеті мен дәстүрлерін насихаттау, халықтың бірлігін көрсету болды. Біздің орталықтың тыңдаушылары мемлекеттік тілді үйреніп қана қоймай, қазақ халқының бай рухани мұрасын тереңірек танып-білуге ұмтылып жүргеніне қуаныштымын. Баршаңызға зор алғыс білдіремін. Ұлыстың ұлы күні құтты болсын! Әр шаңыраққа береке, ырыс, ынтымақ тілеймін!»,-деді ол.
Іс-шара көрермендерінің бірі, курс қатысушысы, «Диас» ПИТК төрағасы Павел Малошик қазақ тілін меңгеру тек жұмыста ғана емес, күнделікті өмірде де қажет екенін атап өтті. Оның пікірінше, осындай шаралар халықты біріктіреді, бір шаңырақ астында өмір сүріп жатқанымызды тағы бір сезіндіреді.
«Қазақ тілі курстарына қатысып жүргеніме бір жарым айдай болды. Мектепте оқыған едім, бірақ қазір оны тереңірек меңгеруге тырысып жүрмін. Сабақтар өте пайдалы. Аптасына екі рет өтеді. Баршаға осы курстарға қатысуға кеңес беремін. Бүгінгі іс-шара маған ерекше ұнады. Қазақ халқының дәстүрлері, әсіресе, бесік туралы, бесік жырлары мен әртүрлі ғұрыптар жайлы көп жаңа мағлұмат алдым. Мен Қазақстанда дүниеге келдім, сондықтан қазақ тілін меңгеру мен үшін маңызды. Жұмыста да қажет, себебі тұрғындардың басым бөлігі қазақ тілінде сөйлейді. Мемлекеттік тілді еркін меңгергім келеді. Сабақтар 1 сағатқа созылады, бірақ мен екі сағатқа дейін қалып оқуға тырысамын. Өйткені маған бұл өте қызықты. Қазақша жақсы сөйлеп, ойымды еркін жеткізгім келеді. ПКСК-де түрлі адамдармен, соның ішінде қазақ тілінде сөйлейтін тұрғындармен жиі кездесемін, сондықтан тілді білу – үлкен артықшылық. Қазақ тілін меңгеру – бұл тек тіл үйрену емес, сонымен қатар қазақ халқының мәдениеті мен рухани құндылықтарын түсіну, еліміздің бірлігін нығайтуға үлес қосу. Осындай шаралар арқылы әрбір азамат қазақ мәдениетінің байлығын сезініп, ұлттық құндылықтарды дәріптеуге өз үлесін қоса алады»,-деп бөлісті Павел Малошик.
Іс-шара соңында барлық қатысушылар мерекелік дастарханнан дәм татып, естелік суретке түсті. Ұлыстың ұлы күні қарсаңында өткен бұл мәдени шара көпшілікке үлкен әсер қалдырды. Қатысушылар қазақ халқының ұлттық киімдері, дәстүрлері мен әдет-ғұрыптары туралы мағлұмат алып қана қоймай, өздері де белсенді түрде атсалысты.
Аякөз ҚОЖАБЕКОВА,
Суретті түсірген автор