Білім саласын дамыту мәселелері Премьер-Министр Әлихан Смайыловтың төрағалығымен өткен Үкіметтегі кеңесте қаралды, деп хабарлайды Tengrinews.kz
Үкімет басшысының баспасөз қызметі хабарлағандай, Білім министрлігі халықтың әлеуметтік осал топтарындағы балаларға мемлекеттік тапсырыс шеңберінде жекеменшік мектептерде оқу кезінде жалпыға бірдей білім беру қорынан (мектеп формасымен, тамақпен қамтамасыз ету және т.б.) көмек алуға мүмкіндік беру туралы ұсыныс жасады. Қазіргі уақытта бұл норма мемлекеттік мектептерде оқу кезінде ғана қолданылады. Премьер-министр бұл ұсынысты қолдады.
Сондай-ақ дағдарыс жағдайындағы және мемлекеттік тапсырыс алатын балабақшаларға баруға мүмкіндігі жоқ отбасылардан шыққан балалар үшін тамақтануға ақы төлеу тетігін іске асыру мәселесі қаралды. Бұл шараны 2023 жылдың басында іске қосылатын «отбасының цифрлық картасы» сервисі арқылы іске асыру ұсынылады. Алдағы уақытта оларға азық-түлік шығындарын төлеу үшін дағдарыс жағдайындағы отбасылардан шыққан балаларды анықтау жоспарлануда.
Әлихан Смайылов мемлекеттік органдардың қажетті ақпараттық жүйелерін интеграциялауды аяқтауды және осы бастаманы қаржыландыру тетігін пысықтауды тапсырды. Бұл ретте ол қаражатты мақсатсыз пайдалануды болдырмау үшін олардың жұмсалуын тиімді бақылауды қамтамасыз ету қажеттігіне назар аударды.
«Президенттің тапсырмасы бойынша біз білім беруге орасан зор қаражат бөлеміз және жаңа бастамаларды іске асыруға қосымша ақша бөлуге дайынбыз, бірақ сапа мен тиісті бақылауды қамтамасыз ету қажет», — деді Әлихан Смайылов.
Кеңеске қатысушылар орталықтандырылған деңгейде балабақшаларға Бірыңғай кезекті іске қосуды талқылады, бұл бюджет қаражатын үнемдеуге және орындарды бөлу кезінде сыбайлас жемқорлық тәуекелдерін болдырмауға мүмкіндік береді. Атап айтқанда, екінші деңгейдегі банктер мен eGov қосымшалары арқылы кезекке тұруға және тиісті бағыт алуға мүмкіндік беру жоспарлануда.
Әлихан Смайылов бұл бастаманы қолдап, жаңа жүйеде толық ұйымдастырушылық тәртіпті қамтамасыз етудің маңыздылығын атап өтті: Қос кезекті алып тастау, балалардың деректерін тексеру және т.б.