Декларация тапсыру мерзімінің аяқталуына бір жарым ай уақыт қалды. Табыс пен мүлік туралы декларацияны (270.00-нысан) тапсыруға міндетті Рудный қаласының тұрғындарына оны толтыруды соңғы сәтке дейін қалдырмауға кеңес беріледі. Мұны мемлекеттік кірістер органдарына жеке бару арқылы ғана емес, сондай-ақ электронды түрде, оның ішінде танымал мобильді қосымшалар арқылы да жүзеге асыруға болады.
Рудный қаласы бойынша Мемлекеттік кірістер басқармасының бас маманы Ануарбек Ахметов 2025 жылға арналған табыс пен мүлік туралы декларацияны кімдер тапсыруға міндетті екенін, онда қандай ақпарат көрсетілуі тиіс екенін және белгіленген талаптарды орындамаған жағдайда қандай жауапкершілік қарастырылғанын түсіндірді.
Рудный қаласы бойынша Мемлекеттік кірістер басқармасының деректеріне сәйкес, 2025 жылға арналған 270.00 нысанындағы декларацияны 3 865 адам тапсыруы тиіс. Бүгінгі таңда декларацияны 2 556 адам, яғни оны тапсыруға міндеттілердің жалпы санының 66 пайызы тапсырып үлгерді.
Салықтық міндеттемелерді орындаудың ең жоғары көрсеткіші мемлекеттік қызметшілер мен оларға теңестірілген тұлғалар арасында байқалады. Осы санаттағы 1 245 адамның 1 225-і декларация тапсырды, бұл 98 пайызды құрайды.
Заңды тұлғалар мен квазимемлекеттік сектор ұйымдарының басшылары, құрылтайшылары мен қатысушылары, сондай-ақ олардың жұбайлары арасында бұл көрсеткіш айтарлықтай төмен. 2640 адамның ішінен 1240-ы декларацияларын тапсырды, бұл 47 пайызды құрайды.
Осылайша, декларация тапсырушылар тізіміне енгізілген Рудный қаласы тұрғындарының едәуір бөлігі әлі күнге дейін 270.00-нысанды толтырып, тапсырған жоқ.
Бұл топ негізінен мемлекеттік қызметшілерден, оларға теңестірілген тұлғалардан және олардың жұбайларынан тұрады. Сондай-ақ заңды тұлғалардың басшылары мен олардың жұбайлары да декларация тапсыруға міндетті.
Банктердің, сақтандыру және қайта сақтандыру компанияларының, сондай-ақ инвестициялық портфельді басқарушылардың ірі қатысушылары да (олардың резидент болып табылатын жұбайларымен бірге) декларация тапсыруға міндетті.
270.00-нысанды жеке практикамен айналысатын тұлғалар тапсыруы тиіс. Бұл санатқа адвокаттар, нотариустар, жеке сот орындаушылары және кәсіби медиаторлар жатады.
Сонымен қатар, бұл декларацияны 2025 жыл ішінде салықтық мақсатта өз бетінше мәлімдеуге жататын табыс алған, яғни салық агенті тарапынан салық ұсталмаған табысқа ие болған азаматтар тапсыруы қажет.
Декларация тапсыру міндеттемесі сондай-ақ Қазақстаннан тыс жерде активтері, цифрлық активтері немесе шетелдік банк шоттарында қаражаты бар тұлғаларға да (егер олардың жиынтық құны заңнамада белгіленген шекті мөлшерден асса) қолданылады.
Тізімге сондай-ақ есепті кезең ішінде құны 20 000 айлық есептік көрсеткіштен асатын активтерді иеленген тұлғалар да кіреді. Мұндай активтерге жылжымайтын мүлік, көлік құралдары, заңды тұлғаның жарғылық капиталындағы үлестер, бағалы қағаздар, туынды қаржы құралдары, тұрғын үй құрылысына үлестік қатысу немесе инвестициялық сападағы алтын жатуы мүмкін.
Салық агентіне өзге де шегерімдердің алдын-ала сомасы түрінде салықтық шегерімдерін қолдану туралы өтініш берген азаматтар да 270.00-нысанды тапсыруға міндетті. Тиісті санаттардың толық тізбесі Қазақстан Республикасының Салық кодексінде белгіленген.
«Декларацияны толтырмас бұрын алдын ала дайындалу қажет: қажетті құжаттарды жинақтап, шетелдегі активтер, бағалы қағаздар және цифрлық активтерге қатысты ақпаратты тексеріп алу керек. Сұрақтар туындаған жағдайда, мемлекеттік кірістер органдарынан кеңес алған жөн», — деп атап өтті Ануарбек Ахметов.
Толық ақпаратты Парковая көшесі, 14-үй, 101-кеңсе мекенжайы бойынша орналасқан Рудный қаласының Мемлекеттік кірістер басқармасынан алуға болады. Мамандар декларацияны тапсыру мәселелері бойынша кеңес беріп, практикалық көмек көрсетеді.
Сондай-ақ, ақпаратты Мемлекеттік кірістер комитетінің ресми сайтынан алуға болады. Оған қоса, Мемлекеттік кірістер комитетінің байланыс орталығы немесе тұрғылықты жеріңіздегі мемлекеттік кірістер басқармасы арқылы кеңес алуға мүмкіндік бар.
Салық декларациясын тапсыру мерзімі аяқталғанша әлі уақыт бар, алайда сарапшылар салықтық міндеттемелерді орындауды кейінге қалдырмауға кеңес береді. Құжаттарды алдын ала дайындау және нысанды мұқият толтыру қателіктерден, құжаттарды қайта тапсыру қажеттілігінен және ықтимал әкімшілік айыппұлдардан аулақ болуға көмектеседі.
Снежанна АЖҒУЖИЕВА,
суретті түсірген Даниил САЕНКО