Президент Қасым-Жомарт Тоқаевтың тапсырмасы бойынша Қазақстанда жаңа Азаматтық кодекс әзірленуде. Оның басты мақсаты – заңнаманы қазіргі заман талаптарына, соның ішінде цифрландыру үдерісі мен онлайн мәмілелердің дамуына бейімдеу.
Жаңа Кодекстің негізгі өлшемі құқықтық айқындық болуы тиіс. Яғни азаматтар мен кәсіпкерлер өз құқықтарын, міндеттерін және заңды мүдделерін қорғау тетіктерін нақты түсінуі қажет.
Сонымен қатар заңдардың іс жүзінде қаншалықты тиімді жұмыс істейтінін бағалау маңызды. Цифрландыру рәсімдерді шын мәнінде жеңілдетуге, ал заңнамаға енгізілетін өзгерістер бизнес үшін тұрақты белгісіздік туғызбай, қолданыстағы мәселелерді шешуге бағытталуы тиіс.
Заң ғылымы, құқықтық мониторинг және сала мамандарының сараптамалық пікірлері заңнаманың тиімділігін арттыруға ықпал етуі қажет.
Реформалардың табыстылығын айқындайтын басты көрсеткіш – түсінікті әрі тұрақты құқықтық ережелер, қолжетімді рәсімдер және азаматтардың құқықтарын сенімді қорғау.