Жалғыз голды Семен Дудов соғып, командаға жеңіс сыйлады
19 қазанда басталып, 4 қаңтарда аяқталған «QFL CUP FUTSAL» турнирі Тобыл қаласында өтті. Шешуші ойындар «Астана СК» спорт кешенінде ұйымдастырылды.
Кубокқа Қостанай футбол лигасының 42 командасы қатысты. Турнир топтық кезеңнен тұрды, әр команда 7 матч өткізді. Содан кейін плей-офф кезеңі (жұптық кездесу) өтті. 1/8 финалда Рудныйдың «Технодом-Салават» командасы жас әрі мықты «БК-Строй» командасымен кездесті. Матчтың аяқталуына бір жарым минут қалғанда Семен Дудов есепті теңестірді – 1:1. Ал пенальти сериясында «Технодом-Салават» 5:4 есебімен жеңіске жетті.
1/4 финалда екі рудныйлық команда – «Технодом-Салават» пен «Паприка» кездесті. Қайтадан ауыр ойын өтіп, тағы да пенальти сериясында «Технодом-Салават» жеңіске жетті. Есеп – 2:2 (пенальтиден кейін 4:2). Жартылай финалда команда «Уялы-Астықты» 2:1 есебімен жеңіп, айқын ерік-жігер танытты. Жеңіс матчының шешуші голы соңғы минутта соғылды. Айта кетейік, «Уялы-Астық» – 2023 жылы QFL CUP FUTSAL турнирінің жеңімпазы болған мықты команда.
Финалда «Технодом-Салават» өте мықты қарсылас – «Арлан» командасымен кездесті. Қарсылас команда 11 матч өткізіп, соның 10-ын жеңіспен аяқтап, барлығы 65 гол соққан. Ойын өте тартысты өтті, матч тағдырын жалғыз гол шешті.
– Плей-офф кезеңіне 16 команда шықты, барлығы өте мықты болды, – деп бөлісті «Технодом-Салават» командасының шабуылшысы Семен Дудов. Ол турнирдің «Үздік ойыншысы» деп танылды. – Біздің әуесқой футболымыздың деңгейі жылдан жылға өсіп келеді. Әр командамен ойнау қиын болды. Барлығы қорғанысты күшейтіп, шабуылдауды жетік меңгерген. Екі жыл бұрын лигаға алғаш рет қатысқанымда, ойын деңгейі мұндай болмады. Қазір бәрі басқаша, турнирді ұйымдастыру деңгейі де жақсарды. Тікелей эфирлер, бейнеқайталаулар, комментаторлар бар – бәрі сапалы ұйымдастырылған.
– Финалдық матч ең есте қалғаны, – деп жалғастырды ол. – Біз 1:0 есебімен жеңдік. Жалғыз голды айып добынан мен соқтым. Голдан кейін ойынның аяқталуына 10-12 минут қалған еді. Қарсыластар гол соқпауы үшін бар күшімізді салдық. Команда бір жұдырықтай жұмылды. Қақпашымыз турнирдің «Үздік қақпашысы» деп танылды. Бұл – командалық жеңіс.
Турнир қорытындысы бойынша «Технодом-Салават» чемпион атанды. Екінші орынды «Арлан» иеленсе, үшінші орын «Б. Майлин ауданы» командасына бұйырды. Сонымен қатар, «Үздік қорғаушы» атағын «Арлан» командасынан Күлпеисов Вячеслав, «Үздік шабуылшы» атағын «Б. Майлин ауданы» командасынан Иван Анисов алды.
– Бұл жеңіс біздің командамыз үшін ғана емес, Рудный қаласы үшін де үлкен жетістік. Рудный футзалы жақсы дамыған қала ретінде танымал. Мұны «Аят» кәсіби командасы дәлелдеп жүр. Алайда Қостанай футбол лигасында Кубокты ұзақ уақыт ешкім жеңбеді. Сондықтан бұл жеңіс біз үшін аса маңызды болды, – деді Семен. – Турнирден кейін де команданы құттықтаулар тоқтаған жоқ. Бізге қолдау көрсеткендердің бәріне алғысымыз шексіз!
Біз де рудныйлық спортшыларды жеңістерімен құттықтаймыз! Бұл ойын, сөзсіз, облыстық шағын футбол тарихында ұзақ уақыт есте қалады.
Индира ЕЛЕМЕС,
суреттерді РИУ
баспасөз бөлімі ұсынды