Рудный қаласының мәдениет және демалыс паркінде МӨСБ-2 қызметкерлері «30 игі іс» акциясы аясында игі істер мен жарқын іс-шаралар сериясын өткізді. Барлық іс-шаралардың басты мақсаты — халыққа қызмет ету және қоғамға пайда тигізу.
Негізгі оқиғалардың бірі —«Халыққа қызмет етеміз» атты мерекелік фестиваль болды. Келушілер құтқарушылардың қызметімен танысып, өрт сөндіру техникасы мен құрал-жабдықтарын көре алды. Мерекенің ерекше атмосферасын дала асханасы толықтырды — мұнда барша қатысушыларға ыстық шай мен хош иісті сарбаз ботқасы ұсынылды.
Фестивальдің ең әсерлі бөлігі — құтқару техникасының парады болды. Өрт сөндіру көліктерінің керуені Рудный қаласының орталық көшелерімен жүріп өтіп, тұрғындарға құтқарушы мамандығының маңыздылығын және ерлікке толы еңбегін еске салды.
Іс-шара аясында жас ұрпаққа ерекше көңіл бөлінді. Шараға қала мектептерінің 10–11-сыныптарынан шамамен 150 оқушы қатысты. Оларға құтқарушылар азаматтық қорғаныс қызметі туралы айтып, Мəлік Ғабдуллин атындағы Азаматтық қорғаныс академиясына оқуға түсу мүмкіндіктерін таныстырды. Оқушылар болашақ мамандық туралы көп мәлімет алып, құтқарушы болудың жауапты әрі құрметті іс екенін түсінді.
Күннің соңында бөлім қызметкерлері арасында кроссфит сайысы өтті. Қатысушылар өздерінің күшін, төзімділігін және командалық бірлігін көрсетті — бұл қасиеттер құтқарушы мамандығының ажырамас бөлігі болып табылады.
Осы іс-шаралар Рудный қаласы құтқарушыларының қоғам алдындағы адалдығы мен адам игілігі жолындағы қызметін тағы бір мәрте дәлелдеді.
Гүлім МҰРАТ,
Суреттерді түсірген автор