№2 гимназияның «Жасыл жасағы» қоршаған ортаны абаттандыруға үлес қосып жүр
Таңертеңнен бастап Рудный қаласындағы №2 гимназиясының ауласында қызу жұмыс басталады. Оқушылардың қолында қолғап, тырма, қоқыс жинайтын қаптар. Бірі аумақты тазалап, ретке келтірсе, енді бірі жасыл желектерге күтім жасайды. Ал тағы бір топ оқушы жұмыс аяқталғаннан кейін айналаның таза әрі жинақы болуын қадағалайды.
Бұл — «Жасыл жасақтың» мүшелері. Олар үшін табиғатты қорғау жай ғана бір реттік шара емес, игі дәстүрге айналған.
«Биыл жасыл жасақтың құрамында бастауыш пен 11-сынып аралығындағы ниет білдірген оқушылар жұмыс істейді. Оқушылар аумақты тазалап, гүлдерге күтім жасап, ағаштардың түптерін қопсытып, көшеттерді суарады. Бұл жұмыстар біздің мектеп ауласын таза ұстауға және көркейтуге көп пайда алып келеді», — дейді мектеп директорының орынбасары Айгүл Ахметжанова.
Жасақ мүшелерінің айтуынша, алғашында экологиялық акцияларға қатысу көпшілік үшін достарымен бірге уақыт өткізудің бір мүмкіндігі болған. Алайда уақыт өте келе олардың табиғатқа деген көзқарасы да өзгерген.
«Таза Қазақстан республикалық экологиялық бағдарлама аясында өткізіліп жатқан «Жасыл жасақ» іс-шарасының негізгі мақсаты — оқушыларға экологиялық мәдениетті қалыптастыру, табиғатты қорғауға баулу және қоршаған ортаны таза ұстауға деген жауапкершілікті арттыру. Бұл бастама оқушыларға көптеген экологиялық іс-шараларға белсенді қатысуға, еріктілік пен көшбасшылық қасиеттерін дамытуға мүмкіндік береді», — дейді 10-сынып оқушысы Кәусәр Фазылжан.
«Жасыл жасақтың» жұмысы тек тазалықпен шектелмейді. Оқушылар мектеп аумағын абаттандыруға, көгалдандыру жұмыстарына, экологиялық акцияларға қатысып, қоршаған ортаға ұқыпты қарауды үйренеді. Бұл жұмыстарға ата-аналар да өз үлестерін қосып, балаларымен бірге еңбек етеді. Ата-аналар үшін де бұл — балаларымен бірге пайдалы уақыт өткізіп, ортақ іске үлес қосудың жақсы мүмкіндігі.
«Ата-аналар осындай іс-шараларға белсенді қатысады. Мысалы, сәуір айында біз ағаштар отырғыздық. Ата-аналар көшеттерді отырғызып, суарып, оқушылармен бірге күтім жасайды», — дейді мектеп директорының орынбасары Айгүл Ахметжанова.
Мектеп ұжымы үшін мұндай жұмыстардың тәрбиелік мәні де зор. Оқушылардың жұмысын үйлестіретін педагогтің айтуынша, ең бастысы — балаларды жұмысқа мәжбүрлеу емес, олардың әрқайсысының еңбегі маңызды екенін түсіндіру, өйткені жасыл жасақтың әрбір мүшесі өз ісімен мектепке ғана емес, туған қаласына да пайдасын тигізеді.
Жасақ мүшелері үшін ең бастысы — атқарылған жұмыстың нәтижесін көру. Бір күндік еңбектің өзі айналаны өзгертіп, көңіл-күйді көтереді. Шынында да, жұмыс барысында мектеп ауласы бір үлкен тату командаға айналады. Мұнда маңызды және маңызсыз жұмыс жоқ. Әр оқушы ортақ іске өз үлесін қосуға тырысады.
«Осындай іс-шаралар мектебімізде жылына бірнеше рет өткізіледі. Сенбіліктерге шығамыз, биыл терек көшеттерін де отырғыздық. Бүгінгі іс-шараға он шақты адам болып қатысып жатырмыз. Мектеп айналасындағы шөпті жұлуға, мектеп айналасын жақсартуға үлес қосуыма қуаныштымын. Жұмыс оңай, кез-келген адам істей алады деп ойлаймын», — дейді 10-сынып оқушысы Бағила Әбдібатта.
Бүгінде №2 гимназиясының «Жасыл жасағы» оқушыларды табиғатты аялауға, қоршаған ортаға жанашырлықпен қарауға және қоғамдық жұмыстарға белсенді қатысуға үндеп келеді.
«Жасыл жасақтың» жұмысы — тек тазалық туралы емес. Бұл — жауапкершілікке тәрбиелеу, қоршаған ортаға құрметпен қарау және туған қаласына деген сүйіспеншілікті қалыптастыру.
Ал мектеп оқушылары жұмысты күлімдеп аяқтап жатқанда, бір нәрсе анық байқалады: «Жасыл жасақ» — жай ғана атау емес. Бұл — өз қолдарымен айналасын жақсы жаққа өзгертіп жүрген белсенді оқушылар.
Мүмкін, туған қалаға деген үлкен сүйіспеншілік дәл осындай кішкентай игі істерден басталатын шығар.
Снежанна АЖҒУЖИЕВА,
суретті түсірген Даниил САЕНКО