«Отбасы банк» кеңесшісі «Ұлттық қор — балаларға» және қолжетімді тұрғын үй бағдарламаларының шарттарын түсіндірді
«Отбасы банк» қазақстандықтарға қаражат жинақтау және тұрғын үй мәселесін шешудің бірнеше нұсқасын ұсынады. Банктің қаржылық кеңесшісі Роза Таспаева ең танымал бағдарламалар, депозит ашу шарттары және тұрғын үйге мұқтаж ретінде есепке тұру процесі туралы айтып берді.
«Негізгі нұсқалардың бірі — Қазақстанның барлық азаматына қолжетімді «Баспана» бағдарламасы. Қаражат жинауды бастау үшін «Отбасы банкте» депозиттік шот ашу қажет. Бұл ретте алдымен жеке куәлік талап етіледі. «Отбасы банк» тұрғын үй жинақ салымына жылдық 2 пайыз мөлшерінде сыйақы төлейді. Сонымен қатар, белгіленген шектер аясында және ең жоғарғы шегі 200 айлық есептік көрсеткіш мөлшерімен шектеле отырып, салымшы салынған қаражаттың 20 пайызы көлемінде жыл сайынғы мемлекеттік сыйлықақыны ала алады. 2026 жылы 200 АЕК мөлшері 865 000 теңгені құрайды. Осылайша, егер жыл ішінде осы сома салым ретінде салынса, мемлекеттік сыйақының жалпы мөлшері 173 000 теңге болады. Бұл сыйақыны мемлекет төлейді. Адам депозит ашып, қаражат жинақтай бастайды және жыл сайын мемлекеттік сыйақы ала алады», – деп түсіндірді Роза Таспаева.
«Баспана» бағдарламасы бойынша баспана сатып алу үшін салымшы баспана құнының 50 пайызын жинақтауы қажет. Қалған жартысын банк несие ретінде береді. Рудный қаласының тұрғындары қайталама нарықтан баспана сатып алғанда да осы мүмкіндікті пайдаланады.
Қазіргі уақытта «Ұлттық қор — балаларға» бағдарламасына ерекше назар аударылуда. Бағдарламаға 2006 жылы немесе одан кейін туған балалар қатысады.
2026 жылы бағдарламаға қатысушылардың жинақтаған қаражаты 370,56 АҚШ долларын құрады. Жастар бұл қаражатты 18 жасқа толғаннан кейін пайдалана алады.
Қаражатты тұрғын үй жағдайын жақсартуға (соның ішінде «Баспана» бағдарламасы бойынша депозит ашуға немесе оны толықтыруға) немесе AQYL депозиті арқылы білім алуға қаражат жинақтауға жұмсауға, сондай-ақ оқу орнындағы оқу ақысын төлеуге аударуға болады.
«18 жасқа толған жастар бұл қаражатты тұрғын үй жағдайын жақсартуға немесе білім алуға пайдалана алады. Көбісі баспанаға қаражат жинауды жалғастыру үшін «Отбасы банктен» депозиттік шот ашады немесе ақшаны оқу ақысын төлеуге жұмсайды», — деп түсіндірді банк кеңесшісі.
Өтінім беру үшін бағдарламаға қатысушы адамның электрондық цифрлық қолтаңбасы болуы тиіс. Жеке тұлға қаражатты оқу орнына немесе тұрғын үй жинақ шотына аударуға арналған өтінімді ресімдеу үшін «Отбасы банк» мамандарының көмегіне жүгіне алады.
Бұл жұмыстың тағы бір бағыты — тұрғын үйге мұқтаж азаматтарды есепке қою. 2025 жылдың мамыр айынан бастап бұл процесс «Тұрғын үймен қамтамасыз ету орталығы» порталы (orken.otbasybank.kz) арқылы жүзеге асырылады. Порталда Рудный қаласының тұрғындары өз бетінше тіркеліп, өтінім бере алады.
Сондай-ақ, «Отбасы банк» бөлімшелерінде де көмек алуға болады.
Тіркелудің негізгі шарты — соңғы бес жыл ішінде жылжымайтын мүліктің болмауы. Бұл талап жеке тұлғаға да, оның отбасы мүшелеріне де қатысты.
Баяндамашының айтуынша, Рудный қаласының тұрғындары жаңа жүйеге үлкен қызығушылық танытуда және тұрғын үй бағдарламасына тіркелу туралы сұраныс артып келеді.
Азамат тұрғын үй бағдарламасына қатысу шарттарына сай келсе, оған 1414 нөмірінен хабарлама келеді. Содан кейін ол төлем қабілеттілігін алдын ала мақұлдау үшін банк бөлімшесіне баруы тиіс.
Тұрғын үй ең алдымен әлеуметтік жағынан осал топтардың өкілдеріне беріледі. Олардың қатарына ата-анасының қамқорлығынсыз қалған балалар, көп балалы отбасылар, I немесе II топтағы мүгедектігі бар адамдар, жесірлер, Ұлы Отан соғысының ардагерлері және жауынгерлік іс-қимылдарға қатысқан ардагерлер жатады.
Тұрғын үй бағдарламалары, «Ұлттық қор — балаларға» бағдарламасының қаражатын пайдалану және тұрғын үй кезегіне есепке тұру туралы толық ақпаратты Космонавтов даңғылы, 110-кеңсе мекенжайында орналасқан «Отбасы банк» кеңес беру орталығынан алуға болады. Халыққа кеңес беру сағат 09:00-ден 18:00-ге дейін жүргізіледі. Онлайн қызметтерді пайдалану және өтінім беру үшін электрондық цифрлық қолтаңба (ЭЦҚ) қажет.
Снежанна АЖҒУЖИЕВА,
суретті түсірген Сұлтан СЕРТАЕВ