Рудный қаласының әкімі қатысқан кеңейтілген жиналысқа қаланың кәсіпорындары мен ұйымдарының басшылары қатысты.
Күн тәртібінде бірнеше мәселе көтерілді: жылыту маусымының өтуі мен жылу желілеріндегі ақауларды жою, Тәуелсіздік күнін атап өту шаралары және жаңа жылдық мерекелерге дайындық.
ЖЫЛЫТУ МАУСЫМЫНЫҢ ӨТУІ ЖАЙЛЫ
«Рудный жылу желілері» ЖШС бас инженері Самат Башпаевтың мәліметінше, 1 қазанға дейін әлеуметтік сала нысандарына жылу берілген.
Қала мен Қашар кентінің тұтынушыларына жылу энергиясын беру, тарату және жеткізу қызметтерін қамтамасыз ету үшін «Рудный жылу желілері» ЖШС-нің балансында 182,85 шақырым жылу желісі бар.
Жылыту маусымына дайындық барысында компания магистральдық және таратушы жылу желілерін 20 шақырымға жөндеу және қайта жаңарту жұмыстарын жүргізді, бұл жұмыстарға 9,5 миллион теңгеден астам қаржы бөлінді.
1 және 2 іске қосу кешендерінің магистральдық жылу желілерін қайта жаңарту бойынша ауыспалы жобалар аяқталды, сондай-ақ Қашарда магистральдық құбырларды ауыстыру жүргізілді.
Кәсіпорын өз күшімен 40 лет Октября және Дзержинский көшелеріндегі магистральдық құбырларға күрделі жөндеу жұмыстарын жүргізді.
Тарифтік қаражат есебінен таратушы жылу желілерінің 6,1 шақырымы жөнделді. Ал облыстық бюджет қаражаты есебінен жеке сектордың кварталдық таратушы желілерінің 3,5 шақырымы жөнделді.
Жөндеу жұмыстарының нәтижесінде магистральдық жылу желілерінің тозуы 31,4%-ға дейін төмендеді, ал кварталдық жылу желілерінің тозуы 66%-ды құрайды.
– 2024 жылы 11 ай ішінде жүргізілген авариялар талдауы көрсеткендей, 2023 жылғы 571 ақаумен салыстырғанда, олардың саны 352-ге дейін азайған. 2025 жылға арналған жөндеу жоспары дайындалып, қаржыландыру мәселесі қарастырылып жатыр. Қала мен Горняцкий кентіндегі таратушы желілерде екі ауыспалы жобаны аяқтау жоспарлануда, – деді Самат Башпаев.
Жылыту маусымы басталғалы бері магистральдық жылу желілерінде ақаулар тіркелген жоқ. Кварталдық таратушы желілерде 95 ақау тіркелді, оның ішінде жеке сектор желілерінде 65 ақау болды. Таратушы желілердегі ақауларды жою орташа есеппен үш-бес сағатты алады.
«Рудный жылу желілері» ЖШС-де қажетті көлік және арнайы техникамен жабдықталған алты жөндеу-қалпына келтіру бригадасы бар. Тұтынушыларды желідегі ақауларды жоюға байланысты ажырату туралы барлық ақпарат әкімдік диспетчеріне жедел хабарланып, ПИК және МИБ-ке телефонограммалар жіберіледі.
«Рудный жылу желілері» ЖШС бас инженері жылу энергиясымен қамтамасыз ету қызметтері бойынша тұтынушылар қарызы 619 миллион теңгені құрайтынын айтты. Оның ішінде халықтың қарызы – 341 миллион теңге, бюджеттік ұйымдар – 179 миллион теңге.
ЖАҢА ТАҒАЙЫНДАУ
Кеңейтілген кеңес барысында Рудный қаласының әкімі Виктор Ионенко мемлекеттік мекемелердің жаңа басшыларын таныстырды. Қалалық тұрғын үй қатынастары бөлімінің басшысы болып Азамат Жайлебаев, ал дене шынықтыру және спорт бөлімінің басшысы болып Марс Шунгурбаев тағайындалды.
Азамат Жайлебаев 1984 жылы Қостанай облысы Қарасу ауылында дүниеге келген. Жоғары білімі бар, мамандығы – құқықтану. Жалпы еңбек өтілі 25 жылды құрайды. Бұрын Ильичев ауылдық округінің әкімі, Қарасу ауылының әкімі, Қарасу ауданы әкімдігінің кәсіпкерлік және ауыл шаруашылығы бөлімінің басшысының орынбасары және «Шығыс» ШЖҚ КМК-нің директорының міндетін атқарушы қызметтерін атқарған.
Азамат Анатольевичті таныстыра отырып, Виктор Ионенко тұрғын үй қатынастары бөлімі мен оның басшысының алдында үлкен міндеттер тұрғанын атап өтті.
– Рудный қаласында мемлекеттік тұрғын үй қорынан баспана алу үшін кезекте тұрғандар саны 4000-нан асады. Құрылыс қарқынды жүргізіліп жатыр. Пәтерлерді бөлу, олардың есебін жүргізу және қаланың тұрғын үй қорының бақылауын күшейту қажет. Тұрғын үйді мақсатсыз пайдалану фактілері көп. Бұл салада тәртіп орнату керек, – деді Рудный әкімі Азамат Жайлебаевқа қарата.
Марс Шунгурбаев 1984 жылы Қостанай облысы, Ауылкелді ауданының Тимофеевка ауылында дүниеге келген. Орта арнайы және жоғары білімі бар, дене шынықтыру және спорт мамандығы бойынша бакалавр дәрежесіне ие.
Еңбек жолын 2005 жылы Ауылкелді ауданының Тимофеев орта мектебінде дене шынықтыру пәнінің мұғалімі болып бастаған, онда 2014 жылға дейін жұмыс істеген. Кейін 2015 жылы Бейімбет Майлин ауданының С. Ерғалиев атындағы орта мектебінде дене шынықтыру мұғалімі қызметін атқарған. 2015-2016 жылдары Бейімбет Майлин ауданы әкімдігінің дене шынықтыру және спорт бөлімінде бас маман болып жұмыс істеген. Ал 2016 жылдан бастап Рудныйға тағайындалғанға дейін осы ауданның дене шынықтыру және спорт бөлімін басқарған.
Марс Айдарханұлына Рудный әкімі Виктор Ионенко өте ауқымды міндеттер қойды.
– Біздің қалада спортты дамыту – басым бағыттардың бірі. Екі жаңа дене шынықтыру-сауықтыру кешенін пайдалануға беруді ескере отырып, штаттық кестені қарап, жаттықтырушылар құрамын және кешендердің жұмыс бағыттарын анықтау қажет. Республика бойынша облыстық спорт басқармаларының бірқатар басшылары қызметінен босатылды. Бұдан қорытынды шығару керек.
Биылғы облыстық спартакиадада біз күткен нәтижеге қол жеткізе алмадық. Біз тек үшінші орынды иелендік. Бұл орын біздің деңгейімізге сәйкес емес деп есептеймін. Сондықтан осы жағдайды талдап шығуды сұраймын. Біз бірінші орын алуымыз керек, – деді Марс Шунгурбаевты таныстыра отырып, Рудный әкімі Виктор Ионенко.
ТӘУЕЛСІЗДІК КҮНІН АТАП ӨТУ
Шаралар жалпы білім беретін мектептер мен колледждерде, Рудный индустриялық университетінде өтеді.
– 11-18 желтоқсан аралығында салтанатты жиналыстар, шығармашылық жұмыстар көрмесі, тарих сабақтары, дөңгелек үстелдер және спорттық-ойындық бағдарламалар өткізіледі. Бұл шаралар әлеуметтік сала мекемелерінде қызмет алушыларға арналып ұйымдастырылады. 14-15 желтоқсанда №1 балалар-жасөспірімдер спорт мектебінде шахмат турнирі, ал 14 желтоқсанда «Горняк» спорт кешенінде жасөспірімдер арасында дзюдодан жарыстар өтеді. Сонымен қатар, мәдениет мекемелерінде бірқатар іс-шаралар жоспарланған, – деді ішкі саясат бөлімінің басшысы Гүлшат Ермешекова.
ЖАҢА ЖЫЛҒА ДАЙЫНДЫҚ
Рудный қаласының әкімі Виктор Ионенко жаңа жыл қарсаңында ардагерлер мен зейнеткерлерді құттықтаудың маңыздылығын еске салды. 16 желтоқсан Тәуелсіздік күнінен соң, бірқатар жаңа жылдық шаралар өткізу жоспарланып отыр.
Қаланы жаңа жылға безендіруге биыл 29,5 миллион теңге бөлінді. Мердігермен келісімшарт 18 қарашада жасалған. Алайда сол уақыттан бері ешқандай жұмыстар басталмаған. Бұл дайындыққа қосымша қиындықтар туғызуда. Компания өкілі кешіктіру себебін нақты түсіндіре алмады. Бұл жағдай мемлекеттік сатып алу жүйесіндегі проблемаларды тағы да байқатып отыр.
– Бөлінген қаражат пен келісілген эскиздерге қарамастан, қалада жаңа жылдық безендіру жұмыстары жүргізілмей жатыр, – деді Виктор Ионенко. – Біз оң өзгерістерге үміттенеміз, бірақ жағдай алаңдаушылық тудырып отыр. Қала жаңа жылдық безендірусіз қалуы мүмкін.
Екінші маңызды жоба – мұз қалашығы. Ауа райы өзгеріп, қар жауады деп үміттенеміз. Бұл жобаға шамамен 30 миллион теңге бөлінген. Жаңа шыршамен және жарықтандырумен әдемі қалашық жасауды жоспарлап отырмыз. Мұз қалашығын жасауға арналған келісімшарт жасалған. Бұл жобаға қатысты сұрақтар жоқ, бірақ қардың жоқтығы қиындықтар тудырып отыр.
Барлық меншік нысанындағы басшыларға үндеу жасаймын. Өткен жылы көптеген ұйымдар өз нысандарын безендіруге тиісті қызығушылық танытқан жоқ. Кейбіреулері тек символикалық безендірумен шектелді. Биыл барлық кәсіпкерлер мен ұйымдарды мерекелік безендіру жасауға шақырамын. Бұл қала тұрғындарына жақсы мерекелік көңіл-күй сыйлайды.
Гүлім МҰРАТ,
суреттерді түсірген
Султан СЕРТАЕВ