АҚШ-тың Ауруларды бақылау орталығының мамандары әлемде қызылшамен сырқаттану бойынша статистиканы жариялады – Қазақстан үшінші орында тұр. Бұл туралы KAZ.NUR.KZ тілшісі ұйым сайтына сілтеме жасап хабарлайды.
АҚШ-тың Ауруларды бақылау және алдын алу орталығының (CDC) мәліметтері бойынша, Қазақстанда 2023 жылдың мамырынан қазанына дейін қызылша ауруын жұқтырудың 12 985 жағдайы тіркелген. Ең көп жұқтыру жағдайы Йеменде тіркелген — 25 261. Одан кейін Үндістанда тіркелген — 14 927. Тізімде Эфиопия мен Пәкістан Қазақстаннан төмен тұр — 11 227 және 8,316 жағдай. Сонымен қатар Ресей қызылша ауруы бойынша топ-10 елге кірген – аталған кезеңде 4 305 жағдай тіркелген. Бұл статистика ДДҰ ұсынған ай сайынғы мәліметтерге негізделгені айтылады.
Қазақстандағы қызылша жұқтыру жағдайы
6 желтоқсанда Денсаулық сақтау министрлігінің өкілі Қазақстанда қызылшамен ауырғандардың саны 20 мыңнан асқанын мәлімдеп, елімізде қызылшаға қатысты эпидемиологиялық жағдай әлі де күрделі екенін атап өтті. Өткен аптада Астанада қызылшаға байланысты 327 пациент емделіп жатқанын, оның 248-і балалар екенін хабарлаған едік. Сондай-ақ қалалық штаб құрылып, емханаларда балаларға қосымша жаппай иммундау жүргізу үшін жеке егу кабинеттері ашылған болатын.